حركة المجتمع الديمقراطي

Êzidiyên kampa Newroz cejna Çarşema Sor pîroz kirin

99

QAMIŞLO 

Çarşema Sor sersala gelê Êzidî ye, yek ji cejnên herî kevnar e û tê wateya destpêka jiyaneke nû. Bi boneya cejnê, rêveberiya kampa Newroz ji bo Êzidiyên Şengalê yên li kampê bi cih dibin, şahiyek li dar xist.

Di şahiyê de, şandeyek ji Rêveberiya Xweseriya Demokratîk a Rojava-Bakurê Sûriyê û nûnerên Saziya Civaka Sivîl amade bûn.

Şahî bi rêzgirtinê dest pê kir. Piştre bi navê Rêveberiya Xweser a Şengalê Sed Kesbel axivî, birxêrhatina beşdaran kir, cejna gelê Êzidî, tevahî gelên Kurdistanê û Rêberê gelê Kurd Abdullah Ocalan pîroz kir.

Kesbel da zanîn ku gelê Rojava sala 2014ʹan bi hewara gelê Êzidî yê Şengalê ve çû û gel ji komkujiyan rizgar kirin. Bi boneya cejnê Kesbel şervanên YPG/YPJʹê û tevahî gelê Rojava silav kir.

Kesbel anî ziman ku gelê Êzidî li ser esasê felsefeya Rêbertiyê xwe birêxistin kir, hêzên parastinê û Rêveberiya Xweser a Şengalê ava kirin.

Kesbel di berdewama axaftina xwe de berxwedana Efrînê li dijî dagirkeriya Tirk silav kir û da zanîn ku şervanên Êzidî jî beşdarî şerê li dijî dagirkeriyê bûn.

Bi navê Rêveberiya Xweser a Rojava-Bakurê Sûriyê jî Dijwar Ehmed axivî, cejna gelê Êzidî û tevahî gelên Rojhilata Navîn pîroz kir.

Piştre koma Cûdî ya girêdayî Navenda Çand û Hunerê ya Dêrikê stran li ser çanda Êzidî gotin. Koma Hêvî jî dîlanên ji folklora Êzidî pêşkêş kirin.