حركة المجتمع الديمقراطي

Gelê Efrînê li Şehbayê xwe birêxistin dike

65

ŞEHBA

Li navçeya Til Rifet û gundên Til Ecar, Kefer Entûn û Şêx Îsa, derdora 400 malbatên ji Efîrnê ku ji 2 hezar û 800 welatî pêk tên ji 18’ê Adarê de bi cih bûne. Welatiyên Efrînê xwe li ser esasê komînan birêxistin kirine.

Şêniyên Efrînê bi alîkariya Meclîsa Rêveber a Navçeya Til Rifet komînên xwe ava kirin. Li bajarê Til Rifet û gundên wê 12 komîn hatin avakirin û amadekarî tê kirin ku hin komînên din jî werin avakirin.

Komîn ji şêniyên Efrînê hatine avakirin, di riya komînan re alîkarî li welatiyan tê belavkirin, her wiha kar û xebatên welatiyan tê hêsankirin. Di riya komînan re mal ji welatiyên hatine re têne peydakirin, her wiha di paqijkirina xaniyan de jî alîkariya welatiyan tê kirin. Xebateke hevbeş di navbera welatiyan de tê kirin.

Endama yek ji komînan a bi navê Ferîda Hebeş diyar kir ku di nava rojên hefteyê de ji saet 08.00 û heta 18.00’an dest bi karê xwe dikin û di vê demê de pêdiviyên welatiyan ji şêr zarokan, nan û avê peyda dikin, her wiha alîkariyên wekî din ên tên li welatiyan belav dikin.

Endama Meclîsa Efrînê Muşîra Mele Reşîd jî derbarê mijarê de got ku navçeya Til Rifet tijî welatî bûn û wiha dom kir: “Meclîsa me rola xwe ya rêxistinkirinê, pêk tîne. Heta niha me 12 komîn ava kirin, di komînan de komîte û hevserokatî jî hatiye avakirin. Ev bi alîkariya welatiyan hatiye kirin. Meclîsa me wê xebatên xwe yên xizmeta welatiyan dewam bike.”

Muşîra di dawiya axaftina xwe de jî da zanîn ku ewê komînên din jî ava bikin û ev tişt anî ziman: “Em niha ji bo danîna tureya ceyranê jî kar dikin.”