حركة المجتمع الديمقراطي

KCK’ê ji bo Efrînê bang li Kurdan û mirovahiyê kir

70

Hevserokatiya Konseya Rêveber a KCK’ê destnîşan kir ku kesên yekser an jî neyekser tevlî êrîşên dagirkeriyê yên li ser Efrînê dibin wê neyên efûkirin.

Hevserokatiya Konseya Rêveber a KCK’ê daxuyaniyeke nivîskî weşand û diyar kir ku Efrîn ne tenê ji bo Kurdan, lê ji bo tevahiya mirovahiyê bûye îmtihanek.

KCK’ê bang li ciwanên Kurd kir ku ji artêşa Tirk a qirker re leşkeriyê nekin û hişyarî da cerdevanan.

Daxuyaniya Hevserokatiya Konseya Rêveber a KCK’ê wiha ye:

“Desthilatdariya faşîst a AKP-MHP’ê ku li Tirkiyeyê êrîşî gelê Kurd û hêzên demokrasiyê dike, dijminatiya li gelê Kurd û li demokrasiyê li tevahiya Rojhilata Navîn dike. Bi vî mejî û polîtîkayê ji bo dagirkirinê êrîşî Efrînê dike. Ji bo vê dagirkeriyê pêk bîne, di nava civaka Tirkiyeyê de li ser bingeha dijminatiya li Kurdan şovenîzmê geş dike. Di nava vê şovenîzmê de ji aliyekî ve bi mirovan gotina ‘reîs me bişîne Efrînê’ didin gotin, li aliyê din jî ji hunermendan heta oldaran kincê kamûflajê li pişta wan dikin û dişînin ser sînorê Efrînê. Zarok jî di navê de hemû civakê mîlîtarîst dike.

Bi dagirkirina Efrînê re dixwaze Kurdan bikuje, ji cih û warê wan bike û Kurdistanê bê Kurd bihêle. Dewlet û artêşa Tirk ne tenê li  Bakurê Kurdistanê, li her devera ku Kurd lê ne dijminatiyê li Kurdan dike. Ji ber vê yekê, divê Kurd hemû li ber vê dewletê û artêşa wê rabin. Heta ku Tirkiye demokratîk nebe, wê dijminatiyê li Kurdan bike, wê bi artêş û polîsên xwe Kurdan bikuje. Wê timî Kurdan qir bikin. Ev dewlet dijminê hemû Kurdan e. Lewma divê ti ciwanê Kurd neçe leşkeriyê. Çûyina leşkeriyê tê wateya tevlîbûna li dagirkirina Efrînê û hevpariya dijminatiya li Kurdan. Tê wateya normalkirin û rewakirina qirkirina Kurdan.

Faşîzma AKP-MHP’ê bi rengekî vekirî dijminatiyê li Kurdan dike. Ji xwe tifaqa bi MHP’ê re, tifaqa bi hemû dijminên Kurdan re vê rastiya AKP’ê bi şênberî radixe pêş çavan. Dem hatiye ku Kurd hemû li dijî vê desthilatdariya ku dijminê Kurdan de helwestê nîşan bide. Helwesta herî zelal a vê yekê jî divê ew be ku ciwanên Kurd nema biçin leşkeriya artêşa Tirk. Li cîhanê tişta herî nebaş ew e ku mirov bibe kujerê gelê xwe, mirov bibe hevparê sûcen li dijî gelê xwe.

Pêwîste ciwanên Kurd zanibin ku artêşa Tirk artêşeke qirker e. Wezîfeya xwe ya bingehîn jî zext û zilma ji bo qirkirina Kurdan e. Nobedarê sîstema zordarî û qirkirinê ye. Em vê rola artêşê her roj li Bakurê Kurdistanê dibînin. Niha jî dixwaze Efrînê û tevahiya Rojavayê Kurdistanê dagir bike. Li Başûrê Kurdistanê jî weke hêzeke dagirker li gelek cihan baregehên leşkerî ava kiriye. Ciwanên Kurd bi çûyina leşkeriyê divê nebin parçeyeke ji artêşeke wiha ya dijminê Kurdan. Divê nebin dijminê gelê xwe. Cihê ciwanên Kurd refên gerîla ye û tevgera azadiyê ye ku hêza azadiyê ya gelê Kurd e. Hêza herî rêxistinbûyî ya ciwanên Kurd, gerîlayên azadiyê ne.

Divê ti Kurd bi taybetî jî ciwanên Kurd nebin hevparê dijminatiya li Kurdan, nebin hevparê dagirkeriya li Efrînê. Faşîzma AKP-MHP’ê ji bo Efrînê dagir bike û Kurdan bikuje, hewl dide her kesî bike hevparê vî sûcê xwe. Hewl dide Efrînê bê Kurd bihêle û çeteyan lê bi cih bike. Dixwaze cerdevanan jî di vê hewldana xwe ya dagirkeriyê de bi kar bîne. Bi bikaranîna cerdevanan re wê polîtîkaya ‘bikaranîna Kurdan li dijî Kurdan’ li Efrînê jî bixin meriyetê. Cerdevanên ku ji aliyê hiqûqî ve dibêjin ku gundên xwe diparêzin, tevlî şerekî li cihekî ku eleqeya xwe bi Tirkiyeyê re nîne tên kirin.

Divê cerdevan nebin hevparê vî sûcê ku ji aliyê civaka Kurd û dîrokê ve neyê efûkirin. Divê berê çeka xwe nedin gelê Efrînê yê mazlûm. Pêwîste nebin amûra wê yekê ku Efrînê bê Kurd bihêlin û radestî çeteyan bikin.

Efrîn ne tenê ji bo Kurdan, lê ji bo tevahiya mirovahiyê bûye îmtihanek. Her kesê yekser an jî neyekser tevlî dagirkirina Efrînê bibin wê li pêşberî dîrokî sûcdar bên dîtin û bi ti awayî neyên efûkirin. Tevlîbûna wan a li qirkirina li Efrînê wê mîna deqeke gemarî li eniya wan bimîne. Yên li ber dagirkirina Efrînê rabin jî wê timî pîr û pak û serbilind bin.”